Il-Ministeru ghar-Risorzi u Affarijiet Rurali s-sena l-oħra beda x-xogħol fuq il-promenade ta' Marsaxlokk billi tkabbret u issebbħet il-bankina tan-naħa tal-bini. Ix-xogħol fuq il-promenade pero ma kienx għadu beda minħabba li l-Ministeru kien għadu għaddej f'diskussjonijiet ma' l-Assocjazzjoni Bejjiegħa tal-Monti sabiex jintlaħaq ftehim fuq kif għandu jarma l-monti wara li jitlesta il-proġett ta' tisbiħ.
Saru diversi laqgħat ma' din l-Assocjazzjoni, ma' l-Kunsill Lokali, kif ukoll mal-GRTU li tirrapprezenta` l-istabbilimenti kummerċjali ta' din iż-żona. Kulħadd fehem l-importanza li x-xogħol fuq il-promenade għandu jsir u kulħadd huwa konxju tal-fatt li minn dan il-proġett ser jibbenefika kulħadd; kemm ir-residenti, il-komunita kummerċjali, tal-monti u t-turiżmu nġenerali.
Minħabba t-tisbiħ tal-promenade u l-ħtieġa li wara li dan jitlesta vetturi ma jkunux jistgħu jitilgħu direttament fuq il-promenade. Il-Ministeru ddiskuta ma' l-Assocjazzjoni u l-Kunsill Lokali sabiex tinstab soluzzjoni vijabbli ta' kif il-monti jista' jarma ġaladarba l-proġett jitlesta. Saru diversi proposti u kontroproposti minn naħa tal-Gvern u tal-Assocjazzjoni, kollha intiżi sabiex jibqa' jsir il-monti, jitnaqqas l-impatt fuq il-komunita' tal-madwar u jassigura li l-investiment li qed isir mill-Gvern ikun protett. L-unika proposta fattibbli għal kulħadd hija dik li l-monti jibqa' jarma eżattament fejn qiegħed illum, f'żewġ ringieli tul il-promenade kollu, fil-ħinijiet kif stabbiliti skond l-Atti li jirregola l-monti u l-ftehim mall-Kunsilli Lokali. Id-differenza li ser ikun hemm hija li r-ringiela ta' stalls li jarmaw ma' n-naħa tal-baħar mhux ser tkun tista tarma bil-vettura wara l-istall. Minflok, ser jiġi pprovdut parkeġġ taħt il-bankina biex din il-vettura ma tkunx il-bogħod.
Dan l-arrangament iwassal biex:
il-vetturi ta' kull stall ikunu viċin ta' fejn jintrama l-istall;
l-bejjiegħa ikunu jistgħu jidħlu u joħorġu mill-parkeġġ fi x'ħin ikun hemm bżonn mingħajr ma joqgħodu jaqilgħu lil ta' ħdejhom jew jistennew lil xi bejjiegħa oħra jżarmaw;
ikun hemm dejjem u f'kull ħin passaġġ għall-vetturi ta' emerġenza tul ix-xatt kollu;
l-istalls kollha jkunu bejn wieħed u ieħor fl-istess pożizzjoni fejn huma indikati llum mingħajr ma jiċċaqalqu (jew kif jiġi miftiehem bejniethom u/jew ma' l-Assoċjazzjon tal-monti);
il-promenade ma jkunx hemm bżonn li tidjieq iżda tkun tista' tissebbaħ biex takkomoda l-istalls kollha tal-monti li llum jarmaw fuqha flimkien ma' l-ħafna Maltin u turisti li jżuru dan il-post pittoresk.
Il-Ministeru konvint li wara xhur ta' laqgħat u konsultazzjoni, u wara li semgha l-proposti kemm tal-bejjiegħa tal-monti, ta' l-Kunsill Lokali, kif ukoll tal-Komunita' Kummerċjali u s-Sajjieda, din is-soluzzjoni hija l-aħjar waħda fl-aħjar interess ta' kulħadd.
Dan l-arranġament ser ikun attwat wara li jitlesta il-proġett. Sakemm isir ix-xogħol fuq il-promenade u tinbena mill-ġdid it-triq, bi qbil ma' l-Assoċjazzjoni tal-Bejjiegha tal-Monti, bħala arranġament temporanju, l-monti se jiċċaqlaq għaż-żona tal-Magħluq sabiex b'hekk ikun akkomodat kulħadd, f'dan il-perijodu sakemm isiru x-xogħlijiet fuq il-promenade. ser isir kull sforz sabiex ix-xogħol meħtieġ isir fl-inqas żmien possibbli.